भटक्या विमुक्तांचे पदोन्नतीतील आरक्षण कायम करा; पिंपरी-चिंचवड शहरात आंदोलन

0
98

पिंपरी-चिंचवड (प्रतिनिधी) : भारतीय जनता पार्टी भटके विमुक्त पिंपरी चिंचवड जिल्ह्यातर्फे भटक्या व विमुक्त कर्मचाऱ्यांना पदोन्नतीतील आरक्षण कायम ठेवा अशी मागणी मुख्यमंत्री उध्दव ठाकरे यांच्याकडे केली आहे.

राज्य शासनाच्या वतीने सरकारी वकील सचिन पाटील यांनी भटके विमुक्त जाती जमातीच्या शासकीय कर्मचाऱ्यांच्या/ अधिकाऱ्यांच्या पदोन्नतीमधील आरक्षणाबद्दल मा. सर्वोच्च न्यायालयात प्रतिज्ञापत्र दाखल केले आहे, या प्रतिज्ञापत्रात भटक्या विमुक्त जातीजमातींना आरक्षण  देणे असंविधानिक आहे, असे म्हटले आहे. ही बाब भटक्या समाजासाठी अत्यंत अन्यायकारक व घातक आहे, यामुळे केवळ सरकारी कर्मचारी/ अधिकारीच नव्हे तर संपूर्ण भटक्या विमुक्त  समाजामध्ये तीव्र संतापाची लाट पसरली आहे.

भटक्या विमुक्तांचे पदोन्नतीतील आरक्षण कायम करा; पिंपरी-चिंचवड शहरात आंदोलन

 भटक्या विमुक्तमधील बहुतेक जातींची अनुसूचित जाती जमातीमध्ये समावेश व्हावा, अशी अनेक वर्षांपासून मागणी आहे. अनुसूचित जाती जमाती प्रमाणेच भटक्या विमुक्ताना लोकसंख्येच्या प्रमाणात सरकारी नोकरीत आरक्षण, राजकीय आरक्षण, शैक्षणिक आरक्षण तसेच पोटासाठी भटकंती करणाऱ्या या समाजासाठी अ‍ॅक्ट्रोसिटी कायदा लागू करणे व अर्थसंकल्पात लोकसंखेच्या प्रमाणात निधीची तरतूद करणे या सर्व मागण्या अनेक वर्षांपासून हा समाज करत  असताना त्यावर आपण कोणतीही कार्यवाही न करता सध्या मिळत असलेले तुटपुंजे आरक्षणही आपल्या नेतृत्वाखाली, आघाडी सरकारचे तथाकथित शिल्पकार व मार्गदर्शक, सतत शाहू, फुले आंबेडकरांच्या नावाचा ढोंगी घोष करणारे खा. शरद पवार यांच्या सल्ल्यानुसार आघाडी सरकारचा  डाव दिसून येत आहे, हा डाव संपूर्ण समाजाच्या लक्षात आला आहे. राज्यात सुमारे 20% असलेला हा भटका समाज आपल्या पक्षासह सरकारमध्ये सहभागी असलेल्या इतर दोन राजकीय पक्षाला मोठा धडा शिकवल्याशिवाय स्वस्थ बसणार नाही.

  ठाकरे सरकारने या विषयाचे गांभीर्य ओळखून मा. न्यायालयात सादर केलेले प्रतिज्ञापत्र तात्काळ मागे घेऊन भटक्यांचे आरक्षण पूर्ववत चालू ठेवण्यासाठी नव्याने प्रतिज्ञापत्र दाखल करावे. अन्यथा याविरोधात भाजप भटके विमुक्त आघाडीच्यावतीने संपूर्ण राज्यभर तीव्र आंदोलन करण्यात येईल, या आंदोलनाच्या परिणामास शासन जबाबदार असेल.

यावेळी भाजप भटके विमुक्त आघाडीचे शहर अध्यक्ष माजी नगरसेवक रघुनंदन घुले, प्रदेश प्रसिद्धी प्रमूख प्रमोद परदेशी, युवा पश्चिम महाराष्ट्र संयोजक सौरभ शिंदे, महिला शहर अध्यक्ष माजी नगरसेविका मीनाताई ढोले, महादेव कासार, राहुल तंबोली व इतर पदाधिकारी उपस्थित होते.