मुलींचं लग्नाचं योग्य वय तसेच आई बनण्याचं योग्य वय काय? याबाबत बऱ्याचदा तुम्ही ऐकलं असेल. योग्य वयात लग्न करा, तसेच वयाच्या तिशीपूर्वीच आई बनण्याचा निर्णय घ्या असं प्रत्येकाच्या कुटुंबामधील वरिष्ठ व्यक्ती सांगत असते. फार पूर्वीपासूनच योग्य वयात लग्न करणं, वयाच्या तिशीपूर्वीच आई बनण्याचा निर्णय घेणं ही प्रथा चालत आली आहे. मात्र आता काळ बदलला आहे. आजच्या पिढीतील स्त्रिया स्वतंत्र्य विचाराच्या आहेत. त्यामुळे लग्न करणं आणि आई होण्याचा निर्णय घेणं याबाबत त्या विचारपूर्वक निर्णय घेतात.

अभिनेत्री ऐश्वर्या राय बच्चन, करिना कपूर खान, शिल्पा शेट्टी कुंद्रासारख्या बॉलिवूडमधील टॉपच्या अभिनेत्रींनी देखील वयाच्या तिशीनंतरच आई बनण्याचा निर्णय घेतला. मात्र या वयामध्ये आई बनण्याचा निर्णय घेणं खरंच योग्य आहे का?, याचे काही फायदे व तोटे आहेत का? याची माहिती असणं देखील गरजेचं आहे.

​प्रजनन क्षमता कमी होणे

आपलं करिअर, आर्थिक टप्पा सांभाळत स्त्रिया लग्न तसेच आई बनण्याचा निर्णय घेतात. मात्र वाढत्या वयानुसार तुमच्या शरीरामध्ये अनेक बदल होत असतात. अशावेळी योग्य वेळी आई बनण्याचा निर्णय घेणं फायदेशीर ठरू शकतं. वयाचा एक विशिष्ट टप्पा पार केल्यानंतर शरीरामध्ये विविध बदल होण्यास सुरुवात होते. यामुळे गर्भ राहण्यास देखील अडथळा निर्माण होऊ शकतो. तसेच वाढत्या वयानुसार गर्भाशयामध्ये तयार होणाऱ्या बिजांची संख्या देखील कमी होऊ लागते. तसेच तुम्हाला वंध्यत्वाचा देखील सामना करावा लागू शकतो.

​लांबवलेल्या गर्भधारणेमुळे निर्माण होणाऱ्या समस्या

स्त्रियांनी गर्भधारणेबाबत प्रत्येक निर्णय योग्य त्यावेळी घेणं गरजेचं आहे. योग्यवेळी योग्य तो निर्णय न घेतल्यामुळे अनेक समस्या निर्माण होण्याची शक्यता असते. लांबवलेल्या गर्भधारणेमध्ये आढळणारी समस्या म्हणजे गर्भपात होण्याचा धोका. वाढत्या वयोमानानुसार शरीरामधील हार्मोन्स बदल होतात. तसेच उशीरा गर्भधारणेचा निर्णय घेतल्यामुळे गर्भपाताचा धोका वाढू शकतो. तसेच प्रसुतीदरम्यान देखील अनेक समस्या उद्भवतात. लांबवलेल्या गर्भधारणेमध्ये बऱ्याचदा सिझेरियनचा निर्णय घ्यावा लागतो.

वाढत्या वयात आई बनण्याचा निर्णय घेणं योग्य आहे का?

गेल्या वीस वर्षांपासून कमी वयामध्ये आई बनण्याचा निर्णय घेणाऱ्या स्त्रियांच्या संख्येमध्ये घट झाली आहे. आता बऱ्याच स्त्रिया उशीरा आई बनण्याचा निर्णय घेतात. यामागील मुख्य कारण म्हणजे करिअर अथवा उशीरा लग्न करणे. डेनमार्कच्या आरहूस युनिर्वसिटीमधील स्कुल ऑफ बिझनेस अँड सोशल सायन्सच्या अभ्यासानुसार वयाच्या ३५व्या वर्षी आई बनण्याचा निर्णय घेतल्यास काही लाभ देखील मिळतात. या वयात आई बनलेल्या स्त्रिया ७ ते ११ वयोगटातील मुलांवर कोणत्या गोष्टीचा अधिक ताण देत नाहीत. यामुळे या वयोगटातील मुलं सामाजिक आणि भावनिक दृष्ट्या सक्षम होतात.

मुलांबरोबर असणारं नातं

वयाच्या तिशीनंतर आई बनलेल्या स्त्रिया अधिक समजूतदार असतात. प्रेग्नेंसीमध्ये अथवा प्रेग्नेंसीनंतर देखील प्रत्येक गोष्टीचा अधिक ताण घेणं त्या टाळतात. त्यामुळे मुलांचे संगोपन आणि त्यांचा सांभाळ या स्त्रिया अधिक चांगल्या रितीने करू शकतात. त्याचबरोबरीने आपल्या मुलाबरोबर असणारं त्यांचं नातं अधिक घट्ट होत जात. वाढत्या वयामध्ये आई होण्याचा निर्णय घेतलेल्या स्त्रिया आपल्या मुलांचे संगोपन योग्य पद्धतीने करतात. शिवाय त्यांना योग्य शिकवण देतात.

वाढत्या वयोमानानुसार आई बनण्याचे फायदे

आई बनण्याचं स्त्रियांचं योग्य वय ठरलेलं आहे, त्याच वयात स्त्रियांनी आई बनण्याचा निर्णय घेतला पाहिजे यामागे काहीतरी वैद्यकीय कारणं आहेत. उशीरा आई बनण्याचे जसे तोटे आहेत तसेच फायदे सुद्धा आहेत. वाढत्या वयामधील स्त्रिया मानसिक तसेच भावनिक दृष्ट्या अधिक सक्षम असतात. येणाऱ्या प्रत्येक प्रसंगाला त्या उत्तमरितीने तोंड देतात. तसेच परिस्थितीनुसार स्वतःला सांभाळतात. तसेच मुलांना योग्य ते मार्गदर्शन करतात. यामुळे मुलांचे विचारही सकारात्मक होतात.

​मुलांचं संगोपन

वाढत्या वयात आई बनण्याचे काही फायदे देखील आहेत. ज्या स्त्रिया वयाच्या ३५ वर्षानंतर मुलाला जन्म देतात त्या मुलांची बौद्धिक क्षमता अधिक चांगली असते. तसेच ही मुलं अभ्यासामध्ये देखील अधिक हुशार असतात. आई बनण्याचा उशीरा निर्णय घेतल्याने त्याचा नेहमीच तोटा होतोच असे नाही. आरोग्याच्या दृष्टीने वाढत्या वयातील प्रसुती सुरक्षित झाली की आई आणि मुलांना देखील त्याचा फायदा होतो. आई आपल्या मुलांच्या संगोपनात कोणतीच कसर देखील सोडत नाही.

असाही होतो फायदा

वयाच्या ३५ वर्षापूर्वी आई बनण्याचा निर्णय घेणं कधीही योग्यच आहे. परंतू वाढत्या वयात स्त्रिया हा निर्णय घेत असतील तर काही समस्यांचा देखील सामना करावा लागतो. यामध्ये काही चांगल्या गोष्टी देखील घडतात. ज्या स्त्रिया वयाच्या तिशीनंतर आई बनण्याचा निर्णय घेतात त्या मुलांचा अभ्यासाकडे असणारा कल अधिक वाढू शकतो. वरील दिलेली संपूर्ण माहिती ही एका अभ्यासावर आधारित आहे. त्यामुळे कमी वयात आई बनणाऱ्या स्त्रिया देखील मुलांचे संगोपन अधिक चांगल्या पद्धतीनेच करतात. मुलांचे संगोपन करणं, त्यांच्याबाबतीत प्रत्येक निर्णय घेणं हे तुमच्या समजूतदारपणा आणि बौद्धिक क्षमतेवर अवलंबून आहे.