अहमदनगर: किरकोळ भांडणातून गोळीबाराच्या घटना नेवासा (Newasa) तालुक्यात वाढल्या असून मंगळवारी रात्री पुन्हा एकदा गोळीबाराचा थरार पहायला मिळाला. तालुक्यातील बऱ्हाणपूर ग्रामपंचायतीच्या सदस्यावर हल्लेखोरांनी पाच गोळ्या झाडल्या. त्यामध्ये गंभीर जखमी झालेला हा तरुण सदस्य वेळेत उपचार मिळाल्याने बचावला आहे. हल्लेखोर पळून गेले असून हल्ला कोणत्या कारणातून झाला, याची माहिती अद्याप समोर आलेली नाही. जखमीवर नगरच्या खासगी रुग्णालयात उपचार सुरू आहेत.

यासंबंधी माहिती अशी, बऱ्हाणपूर ग्रामपंचायतीचे सदस्य संकेत भाऊसाहेब चव्हाण मंगळवारी रात्री नऊच्या सुमारास कांगोणी फाट्यावरून बऱ्हाणपूरकडे जात होते. रस्त्यात एका ठिकाणी ते लघुशंका करण्यासाठी थांबले. त्यावेळी दुचाकीवरून आलेल्या दोघा हल्लेखोरांनी त्यांच्यावर गावठी पिस्तुलातून गोळ्या झाडल्या. चव्हाण यांच्या पोटावर, हातावर, पायावर गोळ्या लागल्याचे दिसून आले. त्यानंतर हल्लेखोर पळून गेले. शनिशिंगणापूर पोलिस ठाण्यात यासंबंधी गुन्हा दाखल करण्यात आला आहे.

चव्हाण यांना तातडीने नगरच्या खासगी रुग्णालयात हलविण्यात आले. तेथे डॉ. सतीश सोनवणे यांनी त्यांच्यावर उपचार केले. डॉ. सोनवणे यांनी सांगितले की, ‘चव्हाण यांची प्रकृती आता स्थिर आहे. त्यांच्या शरीरातून तीन गोळ्या काढण्यात आल्या. मात्र, गोळ्या लागून गेल्याच्या आणखी काही जखमा त्यांच्या शरीरावर आहेत. काही गोळ्या हाडांनाही छेदून गेल्या आहेत. सर्व शस्त्रक्रिया करण्यासाठी चार तास लागले. रुग्ण वेळेत उपचारासाठी आला आणि उपचाराला साथ दिल्याने एवढ्या गोळ्या लागल्यानंतरही त्याचा जीव वाचला आहे.’ असेही डॉ. सोनवणे यांनी सांगितले.
शनिशिंगणापूर पोलिस ठाण्याचे पोलीस तपास करीत आहेत. हा हल्ला कोणी केला, कोणत्या कारणावरून केला, हे अद्याप स्पष्ट झालेले नाही. नेवासा तालुक्यात गावठी कट्टे बाळगण्याचे प्रमाण खूप आहे. अनेकदा किरकोळ भांडणातही त्यांचा वापर केला जातो. त्यामुळे गोळीबाराच्या घटना नेवासा तालुक्यात सतत घडत असतात. वाळू तस्करी आणि अन्य अवैध व्यावसायातून या तालुक्यात गुन्हेगारी वाढली आहे. त्यामध्ये युवकांचे प्रमाणही अधिक आहे. काही दिवसांपूर्वी क्रिकेटच्या मैदानावर गोळीबार झाला होता.