मुंबई: राज्यात गेल्या काही दिवसांपासून दैनंदिन नव्या करोना बाधित रुग्णांची (Corona patients) संख्या ८ हजार ते १० हजाराच्या आसपास फिरताना दिसत आहे. आज दिवसभरात १० हजार १०७ नव्या करोना बाधित रुग्णांचे निदान झाले आहे. याबरोबरच आज एकूण १० हजार ५६७ इतके रुग्ण बरे होऊन घरी गेले आहेत. तसेच, आज दिवसभरात २३७ करोना बाधितांचा मृत्यू झाला आहे. (maharashtra registered 10107 new cases in a day with 10567 patients recovered and 237 deaths today)

आजच्या २३७ करोना बाधित रुग्णांच्या मृत्यूबरोबरच राज्यातील मृत्यूदर १.९४ टक्के इतका आहे. याबरोबर राज्यात आतापर्यंत एकूण ५६ लाख ७९ हजार ७४६ रुग्ण बरे झाले आहेत. यामुळे राज्यातील रुग्ण बरे होण्याचे प्रमाण ९५.०७ टक्क्यांवर पोहोचले आहे.

गडचिरोलीत सर्वात कमी सक्रिय रुग्ण

राज्यातील अॅक्टिव्ह रुग्णांची संख्या १ लाख ३६ हजार ६६१ इतकी झाली आहे. राज्यातील सक्रिय रुग्णांचा जिल्हानिहाय विचार करता पुणे जिल्ह्यात सक्रिय रुग्णांची संख्या सर्वाधिक आहे. पुण्यात एकूण १७ हजार ८२० इतके रुग्ण आहेत. मुंबई पालिका हद्दीत हा आकडा १७ हजार ७८२ इतका आहे. ठाणे जिल्ह्यात सध्या १४ हजार १७० रुग्णांवर उपचार सुरू आहेत. तर कोल्हापुरात सक्रिय रुग्णांची संख्या १२ हजार ४८७ इतकी आहे. नागपूर जिल्ह्यात ही संख्या ४ हजार ६७४ इतकी झाली आहे. नाशिकमध्ये सक्रिय रुग्णांची संख्या ४ हजार १७८ इतकी आहे.

या बरोबरच अहमदनगरमध्ये ४ हजार ६१९ इतकी आहे. औरंगाबादमध्ये १ हजार ५३२, नांदेडमध्ये ही संख्या १ हजार १९६ इतकी आहे. जळगावमध्ये २ हजार ५२०, तसेच तर रायगडमध्ये एकूण ४ हजार ०६७ इतके सक्रिय रुग्ण आहेत. अमरावतीत ही संख्या १ हजार ०५४ इतकी आहे, राज्यात सर्वात जास्त सक्रिय रुग्णांची संख्या पुण्यात आहे. तर, सर्वात कमी सक्रिय रुग्णांची संख्या गडचिरोली जिल्ह्यात आहे. येथे सक्रिय रुग्णांची संख्या ३३२ इतकी आहे.

८,७८,७८१ व्यक्ती होम क्वारंटाइन

आतापर्यंत तपासण्यात आलेल्या ३ कोटी ८६ लाख ४१ हजार ६३९ प्रयोगशाळा नमुन्यांपैकी ५९ लाख ३४ हजार ८८० (१५.३६ टक्के) नमुने पॉझिटिव्ह आले आहेत. सध्या राज्यात ८ लाख ७८ हजार ७८१ व्यक्ती होमक्वारंटाइनमध्ये आहेत. तर, ५ हजार ४०१ व्यक्ती संस्थात्मक क्वारंटाइनमध्ये आहेत.