मुंबई : शिवसेना आमदार प्रताप सरनाईक यांनी मुख्यमंत्री उद्धव ठाकरे (Shivsena MLA Pratap Sarnaik Letter To CM Uddhav Thackeray) यांना एक पत्र लिहित राज्याच्या राजकारणात खळबळ उडवून दिली आहे. सत्ताधारी काँग्रेस-राष्ट्रवादीकडून होणाऱ्या कुरघोड्या आणि केंद्रीय तपास यंत्रणांच्या चौकशीचा ससेमिरा टाळण्यासाठी भाजपसोबत जुळवून घ्या, अशी विनंती करणारं पत्र सरनाईक यांनी मुख्यमंत्र्यांना लिहिलं आहे. या पत्राबाबत आता रिपब्लिकन पार्टीचे नेते आणि केंद्रीय मंत्री रामदास आठवले यांनीही प्रतिक्रिया दिली आहे.

‘सरनाईक यांनी पत्र लिहून शिवसेना आणि भाजपने युती करावी अशी स्वागतार्ह भूमिका मांडली आहे. त्यांच्या या भूमिकेचे आपण स्वागत करत असून उद्धव ठाकरे यांनी महाराष्ट्राच्या विकासासाठी भाजपशी युती करावी,’ असं आवाहन केंद्रीय सामाजिक न्याय राज्यमंत्री रामदास आठवले यांनी केलं आहे.

‘उद्धव ठाकरे चक्रात अडकले’

काँग्रेस आणि राष्ट्रवादी काँग्रेस जोडीच्या चक्रात उद्धव ठाकरे अडकले आहेत. दोन्ही कॉंग्रेसच्या दबावामुळे मुख्यमंत्री म्हणून उद्धव ठाकरे यांना काम करणं अवघड होत आहे. महाराष्ट्राच्या हितासाठी, दिवंगत बाळासाहेब ठाकरे यांचे स्वप्न साकार करण्यासाठी, छत्रपती शिवाजी महाराज आणि महामानव डॉ. बाबासाहेब आंबेडकरांचा विचार मजबूत करण्यासाठी शिवसेना भाजपने एकत्र यावं,’ असं आवाहन रामदास आठवले यांनी केलं आहे.

‘काँग्रेस आणि राष्ट्रवादीला बाजूला सारून शिवसेनेने भाजपशी युती करावी ही आमदार प्रताप सरनाईक यांनी मांडलेली भूमिका अत्यंत योग्य आहे. शिवसेना भाजपच्या नेत्यांचे एकमेकांशी आजही आपुलकीचे नाते आहे. त्यामुळे पुन्हा भाजपशी युती करण्यास शिवसेनेला अडचण होणार नाही, अशी प्रताप सरनाईक यांची सूचना योग्य आहे. त्यांच्या सूचनेचा शिवसेना पक्ष प्रमुख आणि मुख्यमंत्री म्हणूनही उद्धव ठाकरे यांनी विचार करावा. त्यांनी या पूर्वी काँग्रेस राष्ट्रवादीशी युती करण्याचा घेतलेला निर्णय बदलावा. शिवसेना प्रमुख बाळासाहेब ठाकरे हे असते तर त्यांनी काँग्रेस राष्ट्रवादीशी युती करण्याचा निर्णय घेऊ दिला नसता. त्यामुळे उद्धव ठाकरे यांनी आपला निर्णय बदलून भाजपशी युती करावी,’ असं आवाहन रामदास आठवले यांनी उद्धव ठाकरे यांना केलं आहे.