मेंदू व फुफ्फुसांवर हल्ला करणाऱ्या फंगसचा मुलांवर होऊ शकतो गंभीर परिणाम, वेळीच घ्या ही खबरदारी

0
27

शासननामा न्यूज ऑनलाईन

करोना विषाणूचा कहर जगभरात सुरूच आहे. करोनाच्या पहिल्या लाटेमध्ये हजारो जणांना आपला जीव गमवावा लागला. आता करोनाच्या दुसऱ्या लाटेमध्ये देखील मृत्युचे प्रमाण आणि करोनाची लागण होणाऱ्यांची संख्या फारशी कमी झालेली नाही. त्यातच भर म्हणजे आता करोनाच्या तिसऱ्या लाटेची देखील चर्चा सुरू झालेली आहे. तज्ज्ञांच्या म्हणण्यानुसार करोनाच्या तिसऱ्या लाटेचा प्रभाव लहान मुलांवर सर्वाधिक असणार आहे. त्यामुळे मुलांच्या आरोग्याबाबत पालकांच्या चिंतेत आणखीनच भर पडली आहे.

याव्यतिरिक्त देशातीमधील विविध राज्यांमध्ये ब्लॅक फंगसची (Black Fungus) लागण झालेले रूग्ण आढळले आहेत. करोनामधून बरे झाल्यानंतर होणारा हा आजार आता अनेकांसाठी भितीदायक ठरत आहे. या फंगसचे रूग्ण आढळल्यानंतर आता एक नवीन बाब समोर आली आहे. करोनाच्या तिसऱ्या लाटेमध्ये ब्लॅक फंगसचा धोका मुलांना देखील आहे. यामुळे पालकवर्ग देखील चिंतेत आहे. ब्लॅक फंगस म्हणजे नेमकं काय आहे, त्याचा मुलांवर नेमका काय परिणाम होतो हे या लेखाच्या आधारे आपण जाणून घेणार आहोत.
​ब्लॅक फंगस म्हणजे काय?

म्युकरमायकोसीस (Mucormycosis) म्हणजेच ब्लॅक फंगस. ब्लॅक फंगसला वैद्यकीय भाषेत म्युकरमायकोसीस म्हणतात. करोनामधून बरे झाल्यानंतर हा आजाराची लागण होते. सध्या या फंगसची लागण झालेल्यांची संख्या देशातील विविध भागांमध्ये दिसून येत आहे. हवा, माती, किड लागलेल्या सेंद्रिय पदार्थांमधून या फंगसची लागण होते. याचा थेट परिणाम सायनस, मेंदू आणि फुफ्फुसांवर होतो. करोनामधून बरे झाल्यानंतर या फंगसची लागण होण्याचा धोका अधिक वाढतो. तसेच याचे गंभीर परिणाम शरीराच्या विविध अवयवांवर होतात.

या आजाराची गंभीरता लक्षात घ्या

ब्लॅक फंगस या आजारापासून दूर राहण्यासाठी तुम्ही योग्य ती खबरदारी घेतली पाहिजे. या आजाराची गंभीरता तुम्ही लक्षात घ्या. काही तज्ज्ञांच्या म्हणण्यानुसार वेळीच या आजारावर योग्य ते उपचार झाले नाही की शरीराच्या विविध अवयवांवर याचा परिणाम जाणवू शकतो. शिवाय हा संसर्ग मेंदू आणि फुफ्फुसांवर थेट हल्ला करतो. त्यामुळे तुम्ही योग्य ती काळजी घेतली पाहिजे. करोनाची लागण होण्यापूर्वी एखाद्या व्यक्तीला काही आजार असेल तर त्या व्यक्तीला या बुरशीजन्य आजाराची लागण होण्याची शक्यता अधिक असते.

फंगल इन्फेक्शन कशामुळे होतं?

तज्ज्ञांच्या म्हणण्यानुसार, रोगप्रतिकारक शक्ती कमी असली की कोणत्याही प्रकारच्या फंगल इन्फेक्शनची लागण आपल्याला होते. निरोगी शरीर आणि उत्तम आरोग्य असणाऱ्या व्यक्तींना फंगल इन्फेक्शन होण्याचा धोका फार कमी प्रमाणात असतो. मात्र सध्या करोना विषाणूनचं थैमान सुरू असताना या फंगल इन्फेक्शनची लागण होण्याचं प्रमाण वाढलं आहे. करोनाच्या तिसऱ्या लाटेमध्ये तर मुलांना फंगल इन्फेक्शन धोका अधिक असू शकतो. यासाठी पालकांनी योग्यवेळी योग्य ती खबरदारी घेतली पाहिजे.

मुलांमधील ब्लॅक फंगसची लक्षणं

करोना चाचणीच्या काही अहवालांनुसार दुसऱ्या लाटेमध्ये मुलांना करोनाची लागण होत असल्याची प्रकरणं समोर आली. यामुळे मुलांना या आजारापासून दूर ठेवायचं कसं हा प्रश्न पालकांना सतावत असतानाच ब्लॅक फंगसने डोकं वर काढलं आहे. करोनाच्या तिसऱ्या लाटेमध्ये मुलांना करोना तसेच ब्लॅक फंगसचा धोका आहे. ब्लॅक फंगसची लक्षणं ओळखायची कशी याची योग्य माहिती असणं देखील गरजेचं आहे. कपाळाला सूज येणे, डोकेदुखी, चेहऱ्याच्या एका बाजूला सूज येणे, नाकाच्या आजूबाजूला काळे डाग दिसणे, डोळ्यांनी धुसर दिसणे, छातीमध्ये दुखणे, खोकला किंवा श्वास घेण्यास अडथळा निर्माण होणे ही मुलांमधील ब्लॅक फंगसची लक्षणं आहेत.

मुलांनाही ब्लॅक फंगसची लागण होऊ शकते का?

देशाच्या विविध भागांमध्ये ब्लॅक फंगसचे रूग्ण आढळले असताना मुलांनाही या फंगसची लागण होऊ शकते का हा प्रश्न तुमच्या मनात नक्की आला असेल. ब्लॅक फंगस हा फार दुर्मिळ आजार आहे. पण करोनामुळे या आजाराने डोकं वर काढलं आहे. तज्ज्ञांच्या म्हणण्यानुसार, ज्यांची रोगप्रतिकारक शक्ती कमी आहे, ज्यांना मधुमेहाचा त्रास आहे त्यांना या इन्फेक्शनचा धोका अधिक आहे. वयस्कर व्यक्तिंच्या तुलनेमध्ये मुलांना मधुमेहाचा त्रास फारच कमी असतो. त्यामुळे मुलांना कमी प्रमाणात या इन्फेक्शनचा धोका आहे.

​या मुलांना झाली ब्लॅक फंगसची लागण

गुजरातमधील एका मुलाला ब्लॅक फंगसची लागण झाल्याचं काही दिवसांपूर्वीच समोर आलं. १३ वयवर्ष असलेल्या या मुलाला करोनाची लागण झाली होती. करोनामधून बरे झाल्यानंतर त्याला ब्लॅक फंगसची लागण झाली. त्यानंतर कर्नाटकमधील वयवर्ष ११ असलेल्या मुलीला तसेच चित्रदुर्गामधील वयवर्ष १२ असलेल्या मुलाला या फंगसची लागण झाली. मात्र डॉक्टरांच्या मते या मुलांना एक्युट ज्युवेनाइल मधुमेहाचा त्रास होता. देशातील विविध भागांमध्ये ब्लॅक फंगसची लागण झालेले रूग्ण आढळले आहेत.

पालकांनी काय खबरदारी घ्यावी?

करोनाच्या पहिल्या लाटेमध्ये वयस्कर तसेच मध्यम वयोगटातील व्यक्तींना करोनाचा धोका होता. मात्र करोनाच्या दुसऱ्या लाटेमध्ये चित्र काही बदलेलं दिसलं. दुसऱ्या लाटेमध्ये मुलांना देखील या आजाराची लागण झाली. आणि आता मुलांना ब्लॅक फंगसचा देखील धोका असल्याचं समोर आलं आहे. हा आजार फार दुर्मिळ असला तरी पालकांनी मुलांची काळजी घेणं गरजेचं आहे. यासाठी विविध उपाय पालकांनी केले पाहिजेत. मुलांना या आजाराबाबत योग्य माहिती द्या. आणि त्याचे होणारे परिणाम देखील समजावून सांगा.

मुलांची काळजी घ्या

सध्याची परिस्थिती पाहता मुलांना प्रत्येक आजारापासून दूर ठेवणं गरजेचं आहे. यासाठी पालकांनी मुलांना घरातचं ठेवलं पाहिजे. तसेच इतरांना घरामध्ये प्रवेश देऊ नका. करोना विषाणूपासून साऱ्यांनाच धोका आहे. म्हणूनच मुलांना घराबाहेर न पाठवता घरीच खेळायला सांगा. बाहेरील इतर कोणी व्यक्ती घरामध्ये आली असेल अथवा जास्त लोकांमध्ये तुमची मुलं असतील तर त्यांना मास्क घाला. डोळे, नाक आणि तोंडाला हात लावण्यापूर्वी मुलांना हात स्वच्छ धुवून घ्यायला सांगा. योग्य ती खबरदारी घेतल्यास आपण या आजाराचा सामना सहजपणे करू शकतो.