Kangana Ranaut: पासपोर्ट प्रकरणी कंगनाला तातडीने दिलासा नाही – kangana ranaut has not relieved in the passport case in bombay high court

0
17


म. टा. विशेष प्रतिनिधी, मुंबई

दोन एफआयआरमुळे पासपोर्ट नूतनीकरण अडचणीचे ठरत असल्याने मुंबई उच्च न्यायालयात धाव घेणारी अभिनेत्री कंगना रणोटला शुक्रवारीही तातडीने दिलासा मिळू शकला नाही. तक्रारदार व पोलिसांचे म्हणणे ऐकल्याविना आम्ही कोणताही आदेश देऊ शकत नाही, असे स्पष्ट करतानाच सोमवारी तातडीने सुनावणी घेण्यासंदर्भात मुख्य न्यायमूर्तींकडे अर्ज करण्याची मुभा न्या. संभाजी शिंदे व न्या. गोविंदा सानप यांच्या खंडपीठाने कंगनाला दिली.

ट्विटर व सोशल मीडियावरील कथित आक्षेपार्ह व सामाजिक तेढ निर्माण करणाऱ्या वक्तव्यांबद्दल वांद्रे न्यायालयाने चौकशीचा आदेश दिल्यानंतर पोलिसांनी कंगनाविरोधात १७ ऑक्टोबर २०२० रोजी देशद्रोहाच्या कलमासह अन्य कलमांखाली एफआयआर नोंदवला. ‘माझ्या पासपोर्टची मुदत सप्टेंबर-२०२१मध्ये संपत आहे. व्यावसायिक कामांनिमित्त वारंवार परदेशात जावे लागते. मात्र पासपोर्ट प्राधिकरणाच्या अधिकाऱ्यांनी एफआयआरचे कारण देत नूतनीकरणाविषयी असमर्थता दर्शवली’, असे गाऱ्हाणे मांडत कंगनाने याविषयी अॅड. रिझवान सिद्दिकी यांच्यामार्फत तातडीचा अर्ज केला आहे. यापूर्वी अर्ज अस्पष्ट स्वरुपाचा असल्याने आणि पासपोर्ट प्राधिकरणाला प्रतिवादी केले नसल्याने न्यायालयाने तातडीचा दिलासा नाकारला होता.

‘धाकड या चित्रपटाचे काही चित्रीकरण हंगेरीमधील बुडापेस्ट येथे करण्याचे वेळापत्रक दीड महिन्यापूर्वीच ठरले आहे. परंतु कंगनाच्या पासपोर्टचे नूतनीकरण रखडल्याने आमचे दररोज १५ लाख रुपयांचे नुकसान होत आहे’, असे म्हणणे निर्मात्यांतर्फे अॅड. हृषीकेश मुंदरगी यांनी मांडले. तर तातडीच्या दिलाशाची गरज असल्याचे म्हणणे अॅड. सिद्दिकी यांनी मांडले. मात्र दुसऱ्या प्रकरणाच्या एफआयआर संदर्भातही सुनावणी घ्यावी लागेल आणि आज वेळेअभावी सुनावणी होऊ शकणार नसल्याने ३० जूनला घेऊ, असे संकेत खंडपीठाने दिले. तेव्हा वकिलांनी सोमवारसाठी आग्रह धरल्याने त्यासंदर्भात मुख्य न्यायमूर्तींकडे अर्जाद्वारे विनंती करण्याची मुभा खंडपीठाने त्यांना दिली.

‘डिड्डा’संदर्भातील एफआयआरलाही आव्हान

‘डिड्डा- दी वॉरियर क्वीन ऑफ काश्मीर’ या नावाच्या चित्रपटाची घोषणा करताना या कथेविषयीच्या स्वामित्व हक्कांचे उल्लंघन केल्याच्या आरोपाखाली दाखल झालेल्या एफआयआरलाही कंगनाने याचिकेद्वारे आव्हान दिले आहे. राणी डिड्डाच्या ऐतिहासिक चरित्राविषयी कथा लिहिणारे लेखक आशिष कौल यांच्या तक्रारीवरून न्यायदंडाधिकारी न्यायालयाने दिलेल्या आदेशाप्रमाणे पोलिसांनी चौकशीअंती मार्चमध्ये कंगनासह तिचा भाऊ अक्षत रणोट, बहीण रंगोली चंडेल, निर्माते कमल जैन यांच्याविरोधात हा एफआयआर नोंदवला. ‘हा अत्यंत चुकीचा व बेकायदा एफआयआर असून या याचिकेद्वारे न्यायदंडाधिकारी न्यायालयाचा आदेश, एफआयआर व पोलिसांनी चौकशीसाठी पाठवलेली नोटीस या तिन्हीला आव्हान दिले आहे’, असे कंगनातर्फे अॅड. सिद्दिकी यांनी खंडपीठाला सांगितले. मात्र, वेळेअभावी आणि प्रतिवादींचे उत्तर आलेले नसताना या प्रश्नावरही तातडीने सुनावणी घेऊ शकत नसल्याचे खंडपीठाने स्पष्ट केले. यातही तातडीच्या सुनावणीसाठी मुख्य न्यायमूर्तींकडे अर्ज करण्याची मुभा खंडपीठाने त्यांना दिली. न्यायालयाच्या सूचनेप्रमाणे सुनावणीपर्यंत पोलिसांकडून कठोर कारवाई होणार नाही, अशी ग्वाही मुख्य सरकारी वकील दीपक ठाकरे यांनी न्यायालयात दिली.



Source link