राज्यातील करोना रुग्णसंख्या आज पुन्हा १० हजारांच्या जवळ; १४३ जणांचा मृत्यू!

0
35

मुंबई : करोनाची दुसरी लाट ओसल्यानंतर राज्यातील रुग्णसंख्या मोठ्या प्रमाणात घटली. त्यामुळे शासनाकडून अनलॉक प्रक्रिया सुरू करण्याचा निर्णय घेण्यात आला. निर्बंध शिथिल झाल्यानंतर पुन्हा गर्दी वाढू लागल्याने गेल्या काही दिवसांपासून राज्यात दैनंदिन रुग्णसंख्या (Maharashtra Corona Cases Today) १० हजारांच्या आसपास आढळत आहे. राज्यात आजही ९ हजार ९७४ नव्या करोना रुग्णांची नोंद झाली आहे. तसंच १४३ जणांनी या आजारामुळे आपले प्राण गमावले आहेत.

आज ८,५६२ रुग्ण बरे होऊन घरी परतले आहेत. राज्यात आजपर्यंत एकूण ५७,९०,११३ करोनाबाधित रुग्ण या आजाराला हरवून बरे झाले आहेत. यामुळे राज्यातील रुग्ण बरे होण्याचे प्रमाण (Recovery Rate) ९५.९१ टक्के एवढे झाले आहे. सध्या राज्यातील मृत्यूदर २ टक्के एवढा आहे.

आजपर्यंत तपासण्यात आलेल्या ४,१०,४२,१९८ प्रयोगशाळा नमुन्यांपैकी ६०,३६,८२१(१४.७१ टक्के) नमुने पॉझिटिव्ह आले आहेत. सध्या राज्यात ६,१९,१६८ व्यक्ती होम क्वारंटाईनमध्ये आहेत, तर ४,२४० व्यक्ती संस्थात्मक क्वारंटाईनमध्ये आहेत.

कोणत्या भागात किती अ‍ॅक्टिव्ह रुग्ण?

राज्यात आज रोजी एकूण १,२२,२५२ अ‍ॅक्टिव्ह रुग्ण आहेत. राज्यातील केवळ चार शहरांमध्ये १० हजारांहून अधिक अ‍ॅक्टिव्ह रुग्ण आहेत. राजधानी मुंबईत १२ हजार ६४६ ठाण्यात १६ हजार ५७१, पुणे इथं १७ हजार ३६४ आणि कोल्हापूरमध्ये ११ हजार ०९५ करोना रुग्णांवर उपचार सुरू आहेत. विदर्भ आणि मराठवाड्यातील बहुतांश जिल्ह्यांमध्ये करोनाच्या अ‍ॅक्टिव्ह रुग्णांची संख्या तीन आकड्यांमध्येच आहे. मात्र कोकणातील विविध जिल्ह्यांमध्ये करोनाचा धोका अद्यापही कायम आहे. रत्नागिरीत ५१८२, सिंधुदुर्गात ५१२८ आणि रायगडमध्ये ५७९० अ‍ॅक्टिव्ह करोना रुग्ण आहेत.

दरम्यान, राज्यात १९ ते २५ जून या काळात आरपीटीसीआर आणि अँटीजेन चाचण्यांचा पॉझिटिव्हिटी दर हा साडेचार टक्क्यांपर्यंत आहे. तर राज्यात सागंली आणि रायगड जिल्ह्यात ८.६ टक्के इतका सर्वाधिक तर पुणे जिल्ह्यात ७.२ टक्के पॉझिटिव्हिटी दर आहे. त्या तुलनेत केवळ आरटीपीसीआर चाचण्यांचा पॉझिटिव्हिटी दर मात्र त्यापेक्षा दुप्पट असल्याचे आढळले. आरटीपीसीआर चाचण्यांचा आठवड्यातील राज्याचा हा दर ८.७ टक्के असून त्यात कोल्हापूर जिल्ह्यात सर्वाधिक १६.८ टक्के पॉझिटिव्हिटी दर आहे.

Source link