नाशिक : शहरातील देवधर गल्लीतील जुन्नरे-जोशी वाडा कोसळला आहे. या वाड्यात वैश्य कुटुंब राहत आहेत. या घटनेत दोन महिला जखमी असून, त्यांना जिल्हा रुग्णालयात हलविण्यात आलं आहे. संगीता अजित वैश्य (५५) आणि रिटा वैश्य (२७) अशी या दुर्घटनेत गंभीर जखमी झालेल्या महिलांची नावे आहेत.
दुर्घटनेची माहिती मिळाल्यानंतर अग्निशमन दलासह मोठा पोलिस फौजफाटा घटनास्थळी दाखल झाला. वाड्याच्या मागे खोदकाम केले असून, अजूनही भिंती कोसळत आहेत. त्यामुळे आजुबाजूच्या रहिवाशांना घराबाहेर काढण्यात आलं आहे. तसंच देवधर गल्लीकडे जाणारे रस्ते पोलिसांनी बंद केले.
वैश्य कुटुंबीय हॉलमध्ये बसलेले असताना वाड्याची भिंत कोसळली. काही महिन्यांपासून वाड्यामागील जागेत जोशी वाड्याचे नूतनीकरण सुरू होते. यावेळी खोदलेल्या जमिनीमुळे वाडा धोक्यात आला. अनेकदा काम थांबविण्यासाठी जोशी यांना सांगूनही त्यांनी ऐकण्याच्या मनस्थितीत दर्शविली नाही आणि जोशी यांच्या कामामुळेच वाडा कोसळल्याचा दावा वैश्य कुटुंबातील सदस्य विनोद खेमचंद वैश्य यांनी केला आहे.
दरम्यान, जखमींवर जिल्हा रुग्णालयात उपचार सुरू असून जोशी यांच्यावर गुन्हा दाखल करण्याची मागणी वैश्य कुटुंबाने केली आहे.