जळगाव: दुचाकीस भरधाव कंटेनरने दिलेल्या जोरदार धडकेत दुचाकीस्वार बाप-लेकाचा मृत्यू झाला. हा भीषण अपघात ११ जून रोजी रात्री नऊ वाजता गुजराल पेट्रोल पंपाजवळ झाला. तर अपघातानंतर कंटेनरच्या फुटलेल्या टाकीतून डिझेल लुटण्यासाठी नागरीकांनी गर्दी केली होती. नागेश्वर पवार (वय ३५, रा. दत्त गॅरेजजवळ, पिंप्राळा) व त्यांचा मुलगा कार्तिक (वय ५) असे मृत पिता-पुत्राचे नाव आहे. (father and son lost lives in container and bike collision on highway in jalgaon)

पवार हे पिंप्राळ्यात पत्नी व दोन मुलांसह राहत होते. ते सुरक्षारक्षकाचे काम करीत होते. दरम्यान, त्यांचा मोठा मुलगा सोहम हा गुजराल पेट्रोल पंपाच्या मागच्या बाजूला राहणाऱ्या त्यांच्या सासऱ्यांकडे काही दिवसांपासून राहण्यासाठी गेला होता. त्याला परत घरी घेऊन येण्यासाठी पवार हे लहान मुलगा कार्तिक याच्यासोबत दुचाकीने निघाले होते. दरम्यान, गुजराल पेट्रोल पंपाजवळील बोगद्याजवळ वळण घेत असताना शिव कॉलनीकडून येणाऱ्या एका भरधाव कंटेनरने (एनएल ०१ एसी ८६९४) पवार यांच्या दुचाकीस जोरदार धडक दिली. या अपघातात दुचाकी चक्काचूर होऊन पवार पिता-पुत्र गंभीर जखमी झाले. तर कंटेनर देखील रस्त्याच्याकडेला धडकला गेला.

या अपघातानंतर घटनास्थळी नागरिकांची प्रचंड गर्दी झाली होती. काहींनी जखमी पिता-पुत्रांना मदत मिळावी म्हणून तात्काळ त्यांना रुग्णालयात पोहोचवण्यासाठी धडपड सुरू केली. काही संतप्त नागरीकांनी धडक देणाऱ्या कंटेनरच्या काचा फोडून संताप व्यक्त केला. तर काहींनी चक्क कंटेनरच्या फुटलेल्या टाकीतून गळत असलेले डिझेल लुटून नेण्यासाठी धडपड केली. मिळेल त्या भांड्यातून लोक डिझेल घेऊन जात होते.

एकीकडे गंभीर जखमी पिता-पुत्र रस्त्यावर निपचीत पडलेले होते. तर दुसरीकडे डिझेल लुटणाऱ्यांची धांदल सुरू होती. काहींकडे एकच भांडे असल्यामुळे त्यांनी त्यातून दोन-तीन खेपा वाहून नेल्या. पुन्हा भांडे भरण्यासाठी गर्दी केली जात होती. दरम्यान, अशाच परिस्थितीत मदत करणाऱ्या नागरीकांनी जखमी पवार यांना शासकीय वैद्यकीय महाविद्यालय व रुग्णालयात पोहोचवले.

वैद्यकीय अधिकाऱ्यांनी तपासणी केली असता त्यांना मृत घोषित करण्यात आले. तर कार्तिक याला डॉ. उल्हास पाटील वैद्यकीय महाविद्यालय व रुग्णालयात दाखल करण्यात आले होते. त्यालाही डॉक्टरांनी मृत घोषित केले. अपघाताची माहिती मिळाताच पवार यांच्या पत्नी ज्योती ह्या देखील घटनास्थळी दाखल झाल्या होत्या. त्यांच्या डोळ्यादेखत पती, मुलगा निपचीत पडलेला असताना लोक डिझेल चोरत होते. दरम्यान, या अपघातात एकाच कुटुंबातील दोघांचा मृत्यू झाल्यामुळे पिंप्राळा परिसरात हळहळ व्यक्त होते आहे. शनिवारी सकाळी या पिता-पुत्रावर अंत्यसंस्कार करण्यात आले.