कोरोना (Corona virus second wave) होऊन गेला म्हणजे माणसाचा सगळा त्रास संपला असे अजिबात नसते. उलट कोरोना मधून बरे झाल्यावर सुद्धा पुढे कित्येक दिवस शारीरिक त्रासाला सामोरे जावे लागते,. कमजोरी हा त्यामधील महत्त्वाचा त्रास होय. शरीरात निर्माण झालेला हा अशक्तपणा कोरोनाचाच प्रभाव आहे, यावर उपाय म्हणून आणि लवकर रिकव्हर होण्यासाठी तुम्ही पौष्टिक आहारावर भर दिला पाहिजे. कोविडशी (covid19) लढताना शरीराची उर्जा मोठ्या प्रमाणावर कमी होते आणि ती उर्जा भरून काढण्यासाठी चांगला आहाराच तुम्हाला मदत करू शकतो.

शिवाय करोना होऊच नये म्हणून आपल्यापैकी बरेच जण नानाविध प्रयत्न करत आहे पण इतकं करण्याची मुळीच आवश्यकता नाही कारण नाश्त्यात खाल्ले जाणारे हे ७ पदार्थ कोरोनाचा धोका कमी करण्यासही पूरक आहेत. आज आपण या लेखातून अशाच काही पदार्थांबद्दल जाणून घेणार आहोत ज्यांचा समावेश तुम्ही तुमच्या आहारात करायला हवा. यामुळे तुमच्या शरीराला उर्जा मिळेल आणि तुम्ही लवकर ठणठणीत बरे व्हाल. चला तर जाणून घेऊया कोणता आहे तो लाभदायक आहार!

मेथी आणि बाजरीचे पराठे

बाजरी आणि मेथी मिक्स करून नाश्त्यासाठी त्याचे पराठे बनवावेत, यामुळे शरीरातील सूज कमी होईल, तुम्हाला हवा असल्यास तुम्ही पनीरचा पराठा देखील बनवू शकता. जरा अधिक चव यावी यासाठी सोबत शुद्ध लोणी वा दही देखील घेऊ शकता, कार्ब्स, प्रोटीन, फायबर यांनी भरपूर असलेला मेथीचा पराठा तुमच्या दिवसाची एक आरोग्यदायी सुरुवात करण्यासाठी उत्तम आहार आहे. गव्हाच्या पीठाऐवजी मल्टीग्रेन आट्याचा वापर करा. यामुळे तुम्हाला अधिक लाभ मिळेल.

अंडी

बनवण्यासाठी सर्वात सोपी, चविष्ट आणि प्रोटीनने भरपूर असलेली अंडी.. इन्सुलिनचा स्तर संतुलित राखण्यात मदत करतात आणि अँटीऑक्सिडेंटने परिपूर्ण असतात. अंडी तुम्ही अनेक प्रकारे खाऊ शकता. तुम्ही चपाती वा भाकरी सोबत अंडी खाऊ शकता, त्याचे ऑम्लेट बनवू शकता. अर्धे उकडून वा अर्धे तळून मग मल्टीग्रेन पराठ्यामध्ये लपेटून देखील खाऊ शकता. निरोगी शरीरासाठी अंडी एक चांगला स्त्रोत आहेत. म्हणूनच व्यायाम करणारे आवर्जून अंड्यांचे सेवन करतात आणि जाणकार सुद्धा अंडी खाण्याचा सल्ला देतात. अंड्यांमुळे हाडे सुद्धा चांगली सांधली जातात.

उपमा

नेहमी आपल्याला डॉक्टर किंवा आहारतज्ज्ञ सांगत असतात की सकाळचा नाश्ता हलका आणि पौष्टिक असावा. या सल्ल्याला सुसंगत असा सर्वात पौष्टिक पदार्थ म्हणजे उपमा होय. यात भारतीय मसाल्यांचे चांगले मिश्रण असते जसे की आले, कडीपत्ता, जिरे, तसेच याची चव देखील सर्वोत्तम असते. तुम्ही करी व सांबार सोबत देखील उपम्याचा आस्वाद घेऊ शकता. तर मंडळी नाश्त्यामध्ये काय खावे हा प्रश्न पडला कधी तरी थेट उपमा बनवा कारण उपमा बनवायला सोपा असतो आणि खायला अगदीच पौष्टिक आणि लाभदायी!

ढोकळा

गुजराती खाद्यसंस्कृतीमधून आपल्याला मिळालेला एक सुंदर चविष्ट पदार्थ म्हणजे ढोकळा होय. यात डाळ असल्यामुळे ढोकळामध्ये कमी ग्लाइसेमिक इंडेक्स असते, ज्यामुळे हे मधुमेहाच्या रूग्णांसाठी खूप चांगली डिश आहे, कारण याला स्टीम करून बनवले जाते, तेलात तळले जात नाही. त्यामुळे यात अत्यंत कमी कॅलरीज असतात. 100 ग्रॅम ढोकळ्या मध्ये केवळ 160 कॅलरीजच असतात. त्यामुळे तुम्ही आपल्या आहारात ढोकळाचा समावेश देखील आवर्जून करू शकता. यामुळे तुमच्या जिभेचे चोचले पुरवले जातील आणि शरीराला पौष्टिक तत्वांचा पुरवठा देखील होईल.

स्प्राउट्स

स्प्राउट्स चविष्ट आणि अधिक पौष्टिक असतात. हे नाश्त्यामध्ये किंवा जेवणामध्ये खाल्ले जाऊ शकतात. कडधान्यांचा यात समावेश असल्याने यामुळे वजन देखील नियंत्रित राहते आणि याला अधिक टेस्टी बनवण्यासाठी तुम्ही यात खूप साऱ्या भाज्या, कंदमुळे आणि अन्य पौष्टिक पदार्थ तुमच्या आवडीनुसार मिक्स करू शकता. अनेक संशोधनांमधून सुद्धा हे सिध्द झाले आहे की स्प्राउट्स हा प्रोटीनचा देखील एक चांगला स्त्रोत आहे आणि यात अमिनो अॅसिडचा स्तर देखील खूप जास्त असतो.

पालक इडली

व्हिटॅमिन आणि कॅल्शियमने युक्त असलेली इडली आंबवलेल्या तांदळांपासून बनवली जाते. आपल्या नियमित इडली मध्ये पालक टाकून एक हेल्दी ट्विस्ट आपण आणू शकतो आणि सांभर किंवा नारळाच्या चटणी सोबत या इडलीचा आस्वाद घेऊ शकतो. एकदा ही इडली खाल्लीत की तुम्ही याच्या प्रेमात पडलाच म्हणून समजा. तुम्हाला नाश्त्यामध्ये दुसरे जंक फूड खाण्याची इच्छाच होणार नाही. यामुळे पोट देखील खूप वेळ भरलेले राहते. तर मंडळी हे आहेत काही पदार्थ जे तुम्ही पोस्ट कोरोना किंवा कोरोना काळामध्ये आपल्या आहारात समाविष्ट करून निरोगी राहू शकता.