हत्या झालेल्या 35 वर्षीय युवकाचं नाव मंगेश सुरेंद्र पोम असून तो पुरंदर तालुक्यातील पोमणनगर येथील रहिवासी आहे. तर अटक केलेल्या आरोपीचं नाव वैभव सुभाष जगताप (वय-28) असून तो पुरंदर तालुक्यातील पांगारे येथील रहिवासी आहे. या हत्येतील अन्य एक आरोपी ऋषीकेश दत्तात्रय पायगुडे अद्याप फरार असून पोलीस त्याचा तपास करत आहेत. या दोघांनी मिळून मंगेश पोमची हत्या केली आहे.

मृत मंगेश पोम काही दिवसांपूर्वी एका गंभीर गुन्ह्यांत पुण्यातील येरवडा कारागृहात शिक्षा भोगत होता. याच दरम्यान आरोपी वैभवही एका गुन्ह्यात तुरुंगात शिक्षा भोगायला आला होता. दरम्यान मृत मंगेशने आरोपी वैभवला पाय दाबायला लावणे, कपडे धुवायला देणे अशी कामं लावली होती. यानंतर काही दिवसांनी दोघंही शिक्षा भोगून तुरुंगातून बाहेर आले होते.