पुणे, 19 जून: सारथी (Sarathi) संस्थेच्या कामकाजासंदर्भात आज पुण्यात (Pune) महत्त्वाची बैठक पार पडली. उपमुख्यमंत्री अजित पवार (Dycm Ajit Pawar), खासदार संभाजीराजे (MP Sambhaji Raje) आणि मराठा क्रांती मोर्चाचे (Maratha Kranti Morcha) राज्य समन्वयक तसेच सारथी संस्था संचालक मंडळ यावेळी उपस्थित होते. ही बैठक पार पडल्यानंतर खासदार संभाजीराजे यांनी म्हटलं, सारथीसाठी 1000 कोटी रुपये देण्याचा शब्द देण्यात आला आहे.
बैठकीत चांगली चर्चा झाली, सगळे मुद्दे मान्य झाले, गांभीर्याने काम सुरू झालं आहे. सगळ्याच गोष्टी तातडीने होणार नाहीत. 20 ते 21 दिवस लागतील अस सांगितल आहे. हॉस्टेल, तारादूत या सगळ्या प्रश्नावर भूमिका मांडल्या असल्याचंही संभाजीराजे यांनी बैठकीनंतर सांगितलं.
छत्रपती शाहू महाराज संशोधन, प्रशिक्षण व मानव विकास संस्था (सारथी) संस्थेचे सबलीकरण आणि उपक्रम विस्तार करून त्याला 1000 कोटींचा निधी देण्याची मागणी करण्यात आली. यावर राज्याचे उपमुख्यमंत्री अजित पवार यांनी निधी मंजूर केल्याचा शब्द दिला असल्याचं संभाजीराजे छत्रपती यांनी म्हटलं आहे.
सारथी संदर्भातील खालील मागण्यांचे निवेदन देण्यात आले
1) सारथी संस्थेची 8 विभागीय कार्यालये आणि 1 उपकेंद्र सुरू करावीत. नाशिक, अमरावती, नागपूर, नवी मुंबई किंवा ठाणे, औरंगाबाद, लातूर, कोल्हापूर या ठिकाणी अस्तित्वात असलेल्या शासकीय इमारतीत सुरू करणेबाबत. कोल्हापूर शहरात बीटी महाविद्यालयाची इमारत सध्या बंद अवस्थेत आहे. कोल्हापूर शिवाजी विद्यापीठात जागा उपलब्ध असून कुलगुरू डॉ डी टी शिर्के यांची भेट घेतली असून त्यांनी विद्यापीठाच्या अधिसभेत जागा देण्याचा प्रस्ताव सकारात्मक अभिप्रायासह ठेवण्यास अनुकुलता दर्शवली शिवाय विद्यापीठाच्या अखत्यारितील विद्यार्थ्यांना प्राधान्यक्रम द्यावा अशी अपेक्षा व्यक्त केली.
2) राज्यातील शैक्षणिकदृष्ट्या महत्त्वाच्या शहरात पुणे, मुंबई, नाशिक, औरंगाबाद, नागपूर, अमरावती, कोल्हापूर व इतर जिल्ह्याच्या ठिकाणी सारथी मार्फत वसतिगृह सुरू करणेबाबत.
3) अण्णासाहेब पाटील महामंडळाचा प्रत्येक जिल्ह्यात 1 समन्वयक सध्या कार्यरत आहे. त्यासोबत आवश्यक त्या ठिकाणी सारथीचा समन्वयक ठेवल्यास सारथी व अण्णासाहेब पाटील महामंडळ तसेच उच्च व तंत्र शिक्षण विभागाच्या देशातील अन्य ठिकाणी असलेल्या तसेच विविध ठिकाणी असलेल्या संधी याची माहिती देण्याचा हेल्प डेस्क करण्यात आल्यास तरुणांपर्यंत पोहोचता येईल.
4) सारथी संस्थेमार्फत योग्य प्रशिक्षण घेतलेल्या तरुणांना अण्णासाहेब पाटील महामंडळामार्फत सुरू असलेल्या व्याज परतावा योजनेत प्राधान्य द्या.
5) सारथी संस्थेने मेमोरेंडम ठरावानुसार यापूर्वी सुरू केलेले अनेक उपक्रम, कोर्सेस यांची समीक्षा करुन प्रतिसादानुसार व आवश्यकतेनुसार संख्या कमी किंवा जास्त करणेबाबत.
6) कोरोनामुळे होणारे सर्वांगीण बदल लक्षात घेऊन यापुढे देशात, विभागनिहाय व जिल्हानिहाय कोणत्या क्षेत्रात संधी आहेत याचा तज्ञांकडून आढावा घेऊन त्यानुसार नामांकित संस्थांकडून तसेच कोर्सेस सुरू करणे. सारथीच्या संचालक मंडळाने केलेल्या 36 ठरावांची माहिती घ्यावी त्यात अनेक उपक्रम व कोर्सेसची माहिती आहे.
7) नोकरीच्या क्षेत्रात संधीसाठी प्रयत्न करणाऱ्या तरुणांना अधिकचे प्रशिक्षण देऊन त्यांना नवीन संधींसाठी सारथीकडून मदत करणे.
8) सारथी लाभार्थींसाठी उत्पन्न मर्यादा 8 लाख असून त्यात 1 लाखांच्या आत, 3 लाखांच्या आत, 3 ते 5 लाखांच्या आत, 5 ते 8 लाखांच्या आत असे टप्पे तयार करुन कोर्सेस निहाय सारथीकडून देण्यात येणार्या विद्यावेतन फी याचा मदतीच्या प्रमाणाची टक्केवारी ठरवणे.
9) सारथीसाठी मंजूर केलेली 5 शासकीय पदे कामाची आवड असलेल्या अनुभवी शासकीय अधिकाऱ्यांचे प्रतिनियुक्तीवर लवकर भरावी तसेच बाह्य यंत्रणेमार्फत भरवायची 44 पदे लवकर भरण्यात यावीत.
10) 11 महिने कालावधीसाठी तारादूत प्रकल्प सुरू करणेबाबत.
या मार्फत लक्षित घटकांच्या सामाजिक शैक्षणिक आर्थिक विकासासाठी सारथीने ठरवून दिलेल्या टास्कनुसार, मराठा विद्यार्थी, बेरोजगार परंतु संधीच्या शोधात असलेल्या लक्षित घटकांचे सर्वेक्षण करुन त्यांना सारथी प्लॅटफॉर्मचा वापर करणे. निर्वाह भत्ता, शेतकरी, मार्गदर्शन यासह अनेकविध उपक्रमासाठी गावपातळीपर्यंत जाण्यासाठी तारादूत प्रकल्प सुरू करणेबाबत.
11) सारथी संस्थेच्या चौकशीच्या नावाखाली अनेक उपक्रम बंद आहेत. तर काही उपक्रम शासनाच्या मान्यतेसाठी प्रलंबित आहेत ते उपक्रम सुरू करावेत. पुढील तीन वर्षांचा विभाग निहाय रोड मॅप तयार करावा. त्यासाठी विभाग निहाय कार्यशाळा घ्यावा, चर्चा करावी.
12) छत्रपती शिवाजी महाराज स्मृती ग्रंथ बालभारतीकडे प्रलंबित असलेली छपाई पूर्ण करावी.